கறவை மாடுகளின் மடி ஆரோக்கியத்தை மேம்படுத்தி, பால் பண்ணையை இலாபமாக்குங்கள்

 

பால் பண்ணை தொழிலில் இலாபம் ஈட்ட பால் மடியை  பேணிக்காத்து

மடி நோயை  தவிருங்கள்

கறவை மாடுகளில் மடி நோய் என்பது மாடுகளின் பால் மடியை தாக்கும் நோயாகும். இதனால் மாடுகளின் பால்சுரப்பு குறைந்து விவசாயிகள் நட்டமடைவார்கள். இந்த மடி நோய் என்பது இரு வகைகளில் மாடுகளின் ஏற்படுகின்றது. முதல் வகையில் இது நோய் அறிகுறிகளுடன் காணப்படும் ( Clinical Mastitis ). இரண்டாம் வகையில் அறிகுறிகள் இல்லாமல் காணப்படும் ( Sub- clinical Mastitis ). இந்த முதல் வகை மாடுகளின் அதிக பட்ச பால் கொடுக்கும் காலங்களில் அதாவது பெரும்பாலும் கன்று ஈன்ற முதல் 3 மாத காலங்களில் ஏற்படுகின்றது. இந்த காலகட்டத்தில் மாடுகள் மிக அதிகப்படியான அழற்சியால் பாதிக்கப்பட்டிருக்கும். இந்த அழற்சி மாடுகளின் நோய் எதிர்ப்பு சக்தியை குறைகின்ற காரணத்தால் மாடுகளின் மடி காம்பு வழியே உட்செல்லும் நோய் கிருமிகள் மிக விரைவாக நோயை உண்டாக்கும்.

மடிகாம்பிலிருந்து பால் வெளிவரும் துளையானது பால் கறக்கப்பட்ட 15-20 நிமிடங்களில் மிக இறுக்கமாக மூடிக்கொள்வதால்  நோய் கிருமிகள் மடியின் உட் செல்வது முதல்  கட்டமாக தடுக்கப்படுகின்றது. பால் கறந்த 15-20 நிமிடங்கள் வரை மாடுகளை தரையில் படுக்கவிடக்கூடாது. இரண்டாவது கட்டமாக மடிக் காம்பின் உள்ளே மடியிலிருந்து காம்பின் வழியே பால் வெளிவரும் பாதை “கிரடின்"(Keratin) என்ற ஒரு வகை செல்களால் சூழப்பட்டிருக்கும். இந்த கிரடின் செல்கள் மடிக்காம்பின் வழியே நுழைந்த நோய்க்கிருமிகள் மடியின் உள்ளே நுழைவதை தடுக்கின்றன.

நீங்கள் பால் கறக்கும் முறையைப் பொறுத்து இந்த  கிரடின் செல்கள் சிதைக்கப்படுகின்றன. ஓவ்வொரு முறை பால் கறக்கும் பொழுதும் சுமார் 40% வரை இந்த செல்கள் சிதைக்கப்படுகின்றன. அப்படி சிதைக்கப்பட்ட கிரடின் செல்கள் மீண்டும் உருவாகி நோய் கிருமிகள் உள்நுழைவதை தடுக்கின்றன. ஆனால் இந்த செல்கள் அதிக அளவில் சிதைக்கப்பட்டு அவை மீண்டும் உருவாவதில் பிரச்னை ஏற்பட்டால் நோய் கிருமிகள் மிக எளிதில் மடியின் உட் சென்றுவிடும்.

உயிர் சத்துக்களான A, E மற்றும் தாது  சத்துக்களான செலினியம், துத்தநாகம், தாமிரம் போன்றவைகளும் மாடுகளுக்கு நீங்கள் அளிக்கும் தீவனத்தில் இருக்கும் எரிசத்தும் தான் பால் மடிக்கு நோய் எதிர்ப்பு சக்தியை அளிக்கின்றன .

உயிர்சத்து  Eல்  Anti oxidant என்ற தன்மை உள்ளது. இது மடிக் காம்பின் கிரடின் செல்களை பாதுகாக்கின்றது. செலினியம் தாது பால் மடியில் நோய் கிருமிகள் தங்கி இருக்கும் காலத்தை குறைக்கின்றது. அதனால் உயிர் சத்து E மற்றும் செலினியம் தாதுவை மாடுகளின் தீவனத்தில் சேர்ப்பதால் பால் மடிக்கு நோய் எதிர்ப்பு திறன் சிறப்பாக கிடைக்கும்.

மாடுகளின் இரத்தத்தில் உள்ள PMN நியூட்ரோபில் (PolyMorphonuclearNeutrophils)  என்ற செல்கள் உள்ளன. இவை இரத்தத்தில் கலந்து வரும் நோய் கிருமிகளை விழுங்கி அழித்துவிடும் தன்மை கொண்டவை. மாடுகளில் உயிர் சத்து E மற்றும் செலினியம் தாதுக்கள் பற்றாக்குறை ஏற்பட்டால் இந்த நியூட்ரோபில் செல்களின் நோய் கிருமிகளை அழிக்கும் திறன் குறைந்துவிடும் .மாடுகள் பால் கறவை காலத்தில் அவற்றின் தீவனத்தில் உயிர் சத்து Eம், செலினியம் தாதுவும் சேர்க்கப்பட்டால் இந்த செல்களின் அழிக்கும் திறன் அதிகரிக்கும். இந்த சமயங்களில் செலினியம் மற்றும் உயிர் சத்து அதிகம் கொண்ட தீவனங்களை அளிக்கவேண்டும்.

            குறிப்பாக மாடுகள் பால் வற்றும் காலத்தில் ஆரம்பித்து மாடுகள் அதிகம் பால் சுரக்கும் மூன்று மாத காலம் வரை தீவனத்தில் உயிர் சத்து E மற்றும் செலினியம் தாது இருக்கும் படி தீவன பராமரிப்பு செய்தால் மாடுகளில் மடி நோய் வராமல் தவிர்க்க முடியும். மாடுகளுக்கு அளிக்கப்படும் நல்ல பசும் தீவனங்களில் உயிர் சத்து E அதிகமாக உள்ளது. அதனால் கறவை மாடுகளுக்கு பால் வற்றும் காலம் தொடங்கி வருடம் முழுவது நாள் ஒன்றுக்கு  மாடுகளின் உடல் எடையைப் பொறுத்து  30 முதல் 35 கிலோ பசும் தீவனம் அளிக்க வேண்டும்.

          புற்கள் முற்ற முற்ற அதில் உயிர் சத்து E குறைய ஆரம்பிக்கும். அதனால் பரிந்துரைக்கப்பட்ட கால அளவில் புற்களை அறுவடை செய்து மாடுகளுக்கு அளிக்க வேண்டும். மாடுகளுக்கு அளிக்கப்படும் தாமிர சத்து குறிப்பாக பாக்டீரியாக்களுக்கு எதிராக செயல் படும் ஆற்றல் கொண்டவை.

            துத்தநாக தாதுசத்து மாடுகளில் நோய் எதிர்ப்பு சக்தி உருவாக தேவைப்படுகின்றது இந்த தாது keratin செல்கள் உற்பத்திக்கும் மிகவும் அவசியமானது. கன்று ஈன மூன்று வாரங்கள் தொடங்கி கன்று ஈன்ற குறைந்த பட்சம் மூன்று மாதங்கள் வரை அவைகளுக்கு அதிக எரிச்சத்து மற்றும் அதிக புரதம் கொண்ட தீவனத்தை அளிக்க வேண்டும்.

         மாடுகளுக்கு பால் வற்றிய   மாதங்களில் உயிர் சத்து E  யை 1000IU அளவிலும் பால் கறக்கும் மாதங்களில்  500 IU அளவிலும் ஊசி மூலம் அளிக்கப்படவேண்டும். மாடுகளுக்கு அளிக்கப்படும் மொத்த தீவனம் மூலம் செலினியம் 0.3ppm ,துத்தநாகம் 20ppm மற்றும் தாமிர சத்து 20-40ppm  அளிக்கப்படவேண்டும். மாடுகளுக்கு அளிக்கப்படும் தீவனங்களில் இருக்கும் தாது சத்துக்களின் அளவு கீழ்கண்ட அட்டவணையில் அளிக்கப்பட்டுள்ளது. இந்த அட்டவணையை பயன் படுத்தி மாடுகளின் தீவனத்தை தயாரிக்கவேண்டும்.

இத்துடன் பால் கறப்பதற்கு முன்பின்பும் மற்றும் மடிக்காம்புகளை சுகாதாரமாக பராமரிப்பது மடி மாட்டுக் கொட்டகையை சுத்தமாக வைத்திருப்பது போன்ற பராமரிப்பு முறைகளும் பால் மடியின் ஆரோக்கியத்தை பேணிக்காக்கும்.

எழுத்தாளர் பற்றி

பேராசிரியர் டாக்டர் எம் முருகன்- ஆலோசகர், கால்நடை ஊட்டசத்தியல் நிபுணர், அனிமேட்டா அக்ரிடெக் யுவர் ஃபார்ம். முன்னாள் டீன், தமிழ்நாடு கால்நடை மற்றும் விலங்கு அறிவியல் பல்கலைக்கழகம், சென்னை. கால்நடை ஊட்டச்சத்து நிபுணர், கற்பித்தல், ஆராய்ச்சி மற்றும் தொழில்நுட்பத் துறையில் 35+ ஆண்டுகள் அனுபவம் உள்ளவர். அவரது ஆராய்ச்சித் துறையானது தீவன உற்பத்தி ஆகும், இது வேளாண் காடு வளர்ப்பு முறைகளுக்கு சிறப்பு முக்கியத்துவம் அளிக்கிறது மற்றும் கால்நடைகளின் வர்க்கம் சிறியதாக உள்ளது. டாக்டர் எம்.முருகன் தேசிய மற்றும் சர்வதேச இதழ்களில் 43 ஆய்வுக் கட்டுரைகளை வெளியிட்டுள்ளார். அவர் 45 பிரபலமான கட்டுரைகளை வெளியிட்டுள்ளார், 5 புத்தகங்கள் மற்றும் 2 கையேடுகளை எழுதியுள்ளார். அவரது ஆய்வுக் கட்டுரைகள் பல பாடப் புத்தகங்களில் குறிப்பிடப்பட்டுள்ளன. இந்திய கோழிப்பண்ணை அறிவியல் சங்கம், இந்திய விலங்கு ஊட்டச்சத்து சங்கம் மற்றும் தமிழ்நாடு கால்நடை மருத்துவக் கவுன்சில் போன்ற பல தொழில்முறை அமைப்புகளில் உறுப்பினராக உள்ளார்.